Тэнгэр дуугарах

Монголчууд тэнгэр дуугарч цахилгаан цахихыг луутай холбон ярьдаг. Зуны эхэн сард тэнгэр дуугарахыг өнтөй аятай цаг болох нь гэж гэрийн эзэгтэй гоёлынхоо хувцсыг өмсч савтай тараг сүүгээ авч гараад гэрээ нар зөв тойрон тэнгэр газар дэлхий, гэр орноо мялаан цацал өргөж, /зудаа цааш нь зунаа нааш нь/ гэж шившдэг. Дуутай бороотой үед айраг бүлж, задын чулуу, аянганд цохиулж үхсэн малын яс, гурвалжин дүрс бүхий цаас эд юмс, мөн алтангэрэл судрыг айл бүр гэртээ хадгалж байх нь тэнгэр ниргэдэггүй гэж монголчууд үздэг байжээ.